www.ListenMp3.ucoz.ru - Eng so'nggi mp3 va kliplar

Эстрада оламига ўзига ҳос услуби билан кириб келган хонанда Жасур Умиров қисқа вақт ичида машҳурлик даражасига эришди. Хонанданинг ўзига хос жиҳатларидан бири – у ўзбек аёлларининг энг қадимий исмларига бағишлаб қўшиқ куйлайди. Оиша, Жумагул, Ойсара шулар жумласидан.

— Атрофингиздаги ҳаммага ишонасизми?
— Йўқ.

— Нега?
— Ким мени қайси пайт уялтириб қўйиши ёки алдашини билмайман...

— Санъаткор дўстларингиз борми?
— Йўқ. Мени санъаткор ва бирон бир бошқа ҳамкасбимни касбда яқин инсони бўлганини эслолмайман. Кимлардир ўз манфаати учун дўстини ҳам сотиб юбориши ҳеч гап бўлмай қолди...

— Йилнинг нуфузли тақдимотларидан бири "М&ТV-2012” маросимида йилнинг энг яхши эркак хонандасига номзодингиз қўйилган эди, аммо сиз ҳатто, кучли учталикка ҳам кира олмадингиз...
— Менга у ерда ўрин ҳам йўқ эди. Сабаби, бу йилги тақдимот маросимида ҳақиқатдан ҳам кучли меҳнат қилган, узоқ йилдан буён тингловчилар меҳрини қозонган хонандалар қўйилганди. Улар мендан ҳар томонлама кучли саналарди. Мен кейинги йилги тақдимотгача яна ҳам яхшироқ ишлашга ҳаракат қиляпман. Бу йил насиб этмаган бўлса-да, кейинги йил омад кулиб боқар.

— Сиз ҳақингизда тарқалган миш-мишлар қулоғимга чалинди. Гўё сиз қамоқда экансиз. Бу гаплар қанчалик ҳақиқатга яқин?
— (мириқиб кулиб) Биласизми, ўзим ҳақимда тарқалаётган гапларни эшитиб, баъзида қўрқиб кетаман. Санъатдан кетди, Жасур уйланганини ҳаммадан яширди, ҳатто мени ўлдига ҳам чиқаришди-ку. Мана энди мен қамалиб чиққанмишман. Аввалига миш-мишларни эшитиб жуда хафа бўлардим, бугун уларга аҳамият бермайдиган бўлганман. Қамоқ ҳақидагиси эса умуман мантиқсиз гаплар...

— Сиз ҳақингизда ёлғон маълумотлар тарқалишининг сабаби нимада? Шамол бўлмаса, дарахтнинг учи қимирламайди дейишади...
— Мен ҳақимдаги ёлғон гаплар кимларгадир фойдасига тегаётгандир-да. Тўғриси, билмайман... Нима бўлганда ҳам мен доим ҳақиқатга таяниб, унинг борлигига ишонганман. Шунинг учун ёлғон гапларга эътиборсизлик билан қарашга ўргандим.

—"Бақириб” қўшиқ айтасиз... Айнан бу йўналишда куйлаш фикри қандай пайдо бўлган?
— Ижодимни бошлаганимда аслида бундай оҳангда куйламаганман. Ҳамма қатори оддий сиз айтгандек "бақирмасдан” куйлардим. Бир куни студияда қўшиқ ёзиш олди репетицияда, шунчаки ҳазиллашиб "бақириб” қўшиқ куйласам-чи, мана бундай деб "Биллура” қўшиғини куйлаганимда, дўстим Жаъфар эшитиб қолган. Айнан унинг таклифига кўра, ўша куни "Биллура”ни янгича йўналишда куйлагандим. Аммо очиғини айтсам, аввалига менга бу йўналиш умуман ёқмаган. Шундай бўлса-да, уни омма эътиборига тақдим этганмиз. Анча вақт ўтгандан кейингина йўналишим ўзимга ҳам ёқа бошлаган. Кейинчалик билсам, мен айнан овозимга мос йўналишни танлаган эканман.

— Йўналишингизни россиялик хонанда Витасникига ўхшатишади? Сизнинг бунга муносабатингиз?
— Шахсан мен Витас билан йўналишимизни ўхшаш, деб билмайман. Сабаби у фолсет йўналишида куйлайди, мен йўқ.

— Устоз санъаткорлардан бири ижодингизни кўриб, "Бу бола намунча сакрайди-я. Саҳнада сакраш эмас, куйлаш керак-ку” деб танбеҳ берган эди...
— (кулади) Устозларнинг ҳар қандай танбеҳини ўзимга дарс сифатида қабул қиламан. Агар баъзан сакраб қўшиқ куйлаган ва бу устозларимизга ёқмаган бўлса узр сўрайман. Лекин назаримда, ҳар бир санъаткорни ўзига хос жиҳати бўлиши керак.

— Қўшиқларингиз рақсбоп, аммо клип, концертларда ўз қўшиқларингизга рақсга тушганингизни кўрмаганмиз?
— Рақсга тушишни яхши кўраман. Фақат омма олдида эмас. Балки ҳали профессионал рақс ҳаракатларини билмаганим учун уяларман.

— Концертларингизда бошловчиликни ўз бўйнингизга олгансиз. Тан олиш керак, бу вазифани сиз у қадар эплай олмайсиз...
— Бу фикрингизга ўзим ҳам қўшиламан. Айниқса, 2012 йилда бўлиб ўтган сўнгги концерт дастуримда кучли ҳаяжон менга панд берди. Очиғи, саҳнада ўзим нима деётганимни тушунганим йўқ (кулади). Кейинчалик ўзимни четдан кўрганимда бундан жуда уялдим. Кейинги йилги концертларимда бу камчиликларни бартараф этишга ҳаракат қиламан.

— Бугун кўпчилик хонандаларни фильмларда кўряпмиз. Аммо бу борада сиз негадир жимсиз. Ёки кинода рол ўйнашни истамайсизми?
— Рол ўйнагим келади. Фақат бу борада ўзимга ёқадиган таклифларни эшитганимча йўқ.

— Кинода қайси ҳарактердаги инсоннинг ролини ўйнаган бўлардингиз?
— Оила, дўст ва севган ёри учун ҳар қандай қийинчиликларни енгиб ўта оладиган ҳақиқий инсоний хислат эгасини ўйнардим... Қаҳрамоним ҳаётда безори бўлса ҳам қалбининг туб-тубида романтик бўлишини истайман, худди ўзим каби (кулади).

— Жасур Умировни дадасининг арзанда, эркатой фарзанди эканлигини биламиз...
— (кулиб) Аслида, бизнинг оилада ҳамма фарзандлар мен каби эркатой. Дадам ва онам бизларни болалигимиздан, ҳатто ҳозиргача эркалатишади.

— Ўзингиз фарзандларингизга қандай ота бўласиз?
— Мен ҳам шак-шубҳасиз ҳамма фарзандларимни эркалатиб ўстираман. Ота- онамнинг биз фарзандларига қўллаган тарбия усуллари мен учун энг маъқулидир. Тўғри қаттиққўллик ҳам бўлади, аммо бола оилада кўпроқ танқид эмас, мақтов билан ўсиши керак, деб ҳисоблайман.

— Шахсий ҳаётингизни йўлга қўйиш, оила ҳақидаги режаларни ҳам ўйлаб қўйгандирсиз?
— (кулиб) Тўғрисини айтсам, онам келин қидиравериб жуда чарчадилар. Менга ёқадиган қизни топиш қийин бўлишини билмаган эканман. Мана икки йилдирки, келин излаш билан бандмиз. Уйда ҳам доим шу мавзу кўтарилади.

— Жасур Умировнинг рафиқаси қандай бўлиши керак?
— У камтарин, чиройли ва хушфеъл бўлиши керак. Касбимни, ҳаёт тарзимни тўғри тушунадиган қизга уйланаман.

— У санъаткор бўлиши мумкинми?
— Йўқ!

— Нега? Юракка буйруқ бериб бўлмайди-ку...
— Мен санъаткор қизни севиб қолмасам керак, деб ўйлайман. Назаримда, оилада битта санъаткор етади.

— Тўйдан кейин турмуш ўртоғингизни ишлатасизми?
— Албатта. Агар рафиқам ҳам рўзғорга, ҳам касбидаги фаолиятига улгурса унинг ишлашига қаршилик билдирмайман.

ЎЗИМ ҲАҚИМДА...
— Кўпчилик мени жаҳлдор инсон сифатида таърифлашади. Тўғри жаҳлим тез, аммо кези келганда меҳрибон, эътиборли ва романтик хислатларим ҳам бор.

КАМЧИЛИГИМ...
— Уйқучи ва кўпинча дангасалигим менга панд беради. Ҳатто муҳим масалаларда ҳам ухлаб қолиш оқибатида кўп бора қийналганман. Аммо бугун феълимдаги ушбу нуқсонларни йўотиш учун ҳаракат қиляпман.
Бундан ташқари, хаёлпарастлигим ҳам бор. Кўпинча ушбу камчилигим менга машина ҳайдаётганимда панд беради. Хаёл билан кўпинча қизил чироққа тўхтамасдан ўтиб кетадиган одатим ҳам йўқ эмас (кулади).

БОЛАЛИКДАГИ ОРЗУ...
— Болаликда иккита энг катта орзуим бу – санъатор ва спортчи бўлиш эди. Афсуски, улардан фақат биригагина эришдим. Бугун эл таниган санъаткор бўлдим. Аммо спортчи бўлиш орзулигича қолди...

ҚЎШИҚЛАРДАГИ ИСМЛАР...
— Қўшиқларимдаги қизларнинг исмини мухлисларимдан эшитган ҳолда куйлаганман. Биргина мисол Жумагул. Концертларимдан бирида саҳнага гул кўтариб бир қиз чиқди. Жуда чиройли гул даста тутган қизга дастхат қўяётиб исмини сўраганимда, унинг соқов эканини билганман. Шунда унинг дугонаси мухлисимнинг исми Жумагул эканини айтган эди. Ўша пайт бу исмнинг ноодатий ва кам учрашини, вақти келиб Жумагул исмига атаб қўшиқ куйлашимни мухлисимга ваъда бергандим. Шунга ўхшаш воқеалар билан доим кутилмаган "ноёб” исмларни эшитиб қўшиқ куйлайман.