www.ListenMp3.ucoz.ru - Eng so'nggi mp3 va kliplar

Муштарийларимизни қизиқтирган саволларга олий тоифали шифокор-гинеголог Нилуфар АБДУЛЛАЕВА жавоб беради.

Ҳомиладорликда пешоб тутолмаслик...

— 29 ёшдаман. Ҳозир олти ойлик ҳомилам бор. Яқиндан бошлаб тунлари тез-тез кичик ҳожатга қатнайдиган бўлганман. Ҳатто баъзида ҳожатхонага боришга ҳам улгурмай қоламан. Бу шунчаки ҳомиладорликдаги ўзгаришлардан бирими, бирор жиддий хавф йўқми? Маслаҳат беринг, нима қилсам бўлади?

Одина Саидова, Тошкент шаҳри

— Ҳомиладорликда пешоб тутолмаслик нормал ҳолат эмас ва бу ҳомиладорлик даври ўзгаришларига кирмайди.

Кечиктирмай, даволовчи шифокорга учранг. Шифокор тавсияси билан буйраклар ультратовуш текшируви ўтказилади, пешоб таҳлили қилинади, уролог-шифокорга кўрсатма берилади. Ҳомиладорликда пешоб тутолмасликка қарши бир неча самарали муолажалар мавжуд.

Семизлик ҳомиладорликка тўсиқми?

— 20 ёшдаман. Вазним75 кг. Семизликнинг ҳам ҳомиладор бўлолмасликка таъсири борми?

Нигора, Наманган вилояти

— Айрим ҳолларда тана вазнининг меъёрдан ортиқ бўлиши ҳомиладорликка эришишга тўсқинлик қилиши мумкин. Бироқ бунинг учун организмда яна бошқа бир қатор сабаблар ҳам кўрсатилиши керак. Айтайлик, семизлик эндокрин тизим фаолиятидаги ўзгаришлар билан бирга кузатилса, ҳомиладорлик вужудга келиши қийинлашади. Аммо ўз тажрибамда96 кг. тана вазнига эга аёллар ҳам фарзандли бўлганига кўп бор гувоҳ бўлганман. Сизга тавсиям: эндокринолог, терапевт шифокорлар кўригидан ўтиб, организмдаги ўзгаришларни текширтиринг.

«Препаратларнинг зиёни йўқми?»

— 24 ёшдаман. Биринчи фарзандимга ҳомиладорман (8-9 ҳафталик). Текширувларда гемоглобин кўрсаткичи 94 чиқиб, шифокор Магне-В6 ва Гинотардеферон препаратларини буюрди. Ҳомиладорликда препаратлар қабул қилиш мумкин эмас дейишади-ку, қонни кўпайтириш учун халқона усуллардан фойдалансам бўлмайдими?

Санобар, Чирчиқ шаҳри

— Аслида камқонликнинг ўзи ҳомила ривожи учун зарарлидир. Шифокор томонидан буюрилган Магне-В6 ва Гинотардеферон препаратлари эса ҳомила ривожланиши ҳамда меъёрида шаклланиши учун керакли бўлган элементларни таъминлайди. Шу боис уларнинг ҳомилага зиёни йўқ. Тўғри, уй шароитида ҳам камқонликка таъсир этувчи маҳсулотлар (қизил лавлаги, олма, балиқ, сабзавотлар)ни истеъмол қилсангиз ҳам бўлади. Аммо улар етарлича таъсир кўрсатмаслиги мумкин. Шунинг учун буюрилган препаратларни тартибли ва ўз вақтида қабул қилинг.

«Ҳомиладорликдан қандай сақланай?»

— 28 ёшдаман. Икки нафар қизим бор. Бир неча ой аввал режалаштирилмаган ҳомиладорлик юзага келиб, оилавий шароитим сабаб аборт қилдиришимга тўғри келди. Бундай µолатлар қайта такрорланмаслиги учун қандай контрацепция воситаларидан фойдаланиш ишончли? Чунки спираль менга тўғри келмайди. Қолаверса, бачадон бўйнида эрозия ва полип, жинсий аъзоларда варикоз кенгайиш ҳам бор. Гормонал препаратлар ичишдан эса қўрқаман.

Гули, Тошкент шаҳри

— Сиз аввал бачадон эрозияси, полип ва жинсий аъзолардаги варикоз кенгайишга қарши муолажаларни олинг. Чунки беэътибор бўлсангиз, бу касалликлар жиддий асоратларга олиб келиши мумкин. Ана шундан сўнг контрацепция воситаларига мурожаат қилсангиз бўлади. Агар спираль тўғри келмаган бўлса, ҳар уч ойда қилинадиган инъекция уколлари,гормонал препаратлар шунингдек презирватив воситалари ҳам мавжуд. Бироқ бундан аввал албатта тўлиқ даволанинг.